पीएम कुसुम सोलर योजनेअंतर्गत सौर पंप मिळवण्याची प्रक्रिया जाणून घ्या | Solar Pump Yojana

किसानवाणी | शेतकऱ्यांना दिवसा सिंचन करता यावं, शेतीला पाणी देता यावं, यासाठी केंद्र सरकारनं पंतप्रधान कुसुम सोलर योजना (Solar Pump Yojana) आणली आहे. या योजनेतून शेतकऱ्यांना सौर पंप दिले जातात. केंद्र आणि राज्य सरकार त्यासाठी अर्थसहाय्य करतं.

या योजनेतून शेतकऱ्यांना 3, 5 आणि 7.5 HP क्षमतेचे सौर पंप दिले जातात. पात्र अर्जदार शेतकरी सर्वसाधारण प्रवर्गातील असेल तर त्याला एकूण पंपाच्या किंमतीच्या 90% एवढं अनुदान दिलं जातं. आणि पात्र अर्जदार जर अनुसुचित जाती-जमाती प्रवर्गातील असेल तर त्याला एकूण पंपाच्या किंमतीच्या 95% अनुदान दिलं जातं. उरलेली रक्कम संबंधित पात्र लाभार्थ्याला लाभार्थी हिस्सा म्हणून भरावी लागते.

सोलर कृषी पंपाला अनुदान कोणत्या स्वरूपात दिले जाते?

महाराष्ट्र सरकारच्या महाऊर्जा बेवसाईटवर दिलेल्या माहितीनुसार,

• 3 एचपी पंप
  • एकूण किंमत – 1,93,803 रुपये
  • सर्वसाधारण प्रवर्गातील लाभार्थ्याचा हिस्सा– 19,380 रुपये
  • एससी/एसटी प्रवर्गातील लाभार्थ्याचा हिस्सा -9,690 रुपये

• 5 एचपी पंप
  • एकूण किंमत– 2,69,746 रुपये
  • सर्वसाधारण प्रवर्गातील लाभार्थ्याचा हिस्सा – 26,975 रुपये
  • एससी/एसटी प्रवर्गातील लाभार्थ्याचा हिस्सा -13,488 रुपये

• 7.5 एचपी पंप
  • एकूण किंमत – 3,74,402 रुपये
  • सर्वसाधारण प्रवर्गातील लाभार्थ्याचा हिस्सा – 37,440 रुपये
  • एससी/एसटी प्रवर्गातील लाभार्थ्याचा हिस्सा -18,720 रुपये

सोलर कृषी पंपासाठी जमिनीचा निकष काय?

• अडीच एकरपर्यंत जमीन धारकास – 3 एचपी पंप
• अडीच ते 5 एकरपर्यंत जमीन धारकास – 5 एचपी पंप
• 5 एकरपेक्षा जास्त जमीन असल्यास – 7.5 एचपी पंप

सोलर कृषी पंपासाठी पात्रतेचे निकष आणि कागदपत्रे

• 1. पारंपरिक वीज कनेक्शन उपलब्ध नसणारे शेतकरी.
• 2. शेततळे, विहीर, बोअरवेल, नदी/ नाले याच्या शेजारील शाश्वत पाण्याचा स्रोत उपलब्ध असणारे शेतकरी.
• 3. अटल सौर कृषी पंप योजना आणि मुख्यमंत्री सौर कृषी पंप अंतर्गत लाभ न मिळालेले शेतकरी.

सोलर कृषी पंप योजनेचा लाभ घेण्यासाठी आवश्यक कागदपत्रे

• 1. सातबारा उतारा, त्यावर विहिरीची किंवा बोअरची नोंद आवश्यक
• 2. सामायिक सातबारा असेल तर 200 रुपयांच्या बाँडवर इतर भोगवटादारांचं ना हरकत प्रमाणपत्र
• 3. आधार कार्ड
• 4. जातीचा दाखला
• 5. बँक पासबुक फोटो
• 6. पासपोर्ट आकाराचा फोटो

सोलर कृषी पंप योजनेसाठी नोंदणी कशी करायची?

• पीएम कुसुम सोलार योजनेसाठी ऑनलाईन नोंदणी करण्यासाठी सगळ्यात आधी mahaurja.com असं सर्च करायचं आहे. त्यानंतर तुमच्यासमोर महाराष्ट्र ऊर्जा विकास अभिकरचण ही वेबसाईट ओपन होईल.
• उजवीकडे “महाकृषि ऊर्जा अभियान कुसुम सौर कृषी पंप अर्ज नोंदणी” हा पर्याय दिसेल. त्याच्यावर क्लिक करायचं आहे.
• त्यानंतर स्क्रीनवर एक सूचना दिसेल, ती वाचून क्लोज करायची आहे.
• उजवीकडे “सिलेक्ट लँग्वेज” या पर्यायावर क्लिक करून मराठी भाषा निवडायची आहे.
• ’पीएम कुसुम योजना : लाभार्थी नोंदणी” हा अर्ज ओपन होईल.
• सध्या तुम्ही डिझेल पंप वापरत आहात का?, या प्रश्नाचं उत्तर द्यायचं आहे. इथं होय किंवा नाही उत्तर निवडायचं आहे. ‘होय’ असेल तर पंपाच्या उर्जेचा स्रोत, त्याचा प्रकार, उपप्रकार, किती क्षमतेची, वर्षाला किती लीटर डिझेल लागतं ते सांगायचं आहे.
• त्यानंतर अर्जदाराची वैयक्तिक व जमीन विषयक माहिती भरायची आहे. आधार कार्ड नंबर टाकायचा आहे, पुढे जिल्हा, तालुका, गाव निवडायचं आहे. मोबाईल क्रमांक, आणि जात वर्गवारी निवडायची आहे.

जर तुमच्या जिल्ह्यातील कोटा संपला असेल तर तशाप्रकारची सूचना तुम्हाला तिथं दिसेल. कोटा उपलब्ध असेल तर तुम्ही ऑनलाईन अर्जासाठी भरणा या पर्यायावर क्लिक करायचं आहे. पुढे मग तुम्हाला पंपाचा तपशील आणि तुमच्या जिल्ह्यात तुम्ही निवडलेल्या प्रवर्गासाठी किती क्वोटा उपलब्ध आहे ते दाखवलं जाईल. इथं तुम्हाला लाभार्थी हिस्सा भरण्याची प्रक्रिया यावर क्लिक करायचं आहे.

पुढे तुम्हाला एक ट्रान्झॅक्शन आयडी दिला जाईल आणि नोंदणी फी 100 रुपये सांगितलं जाईल. पुढे आल्यानंतर तुम्हाला पेमेंट करण्याचे वेगवगेळे पर्याय दिसतील.इथं सुरुवातीला तुम्हाला तुमचं नाव, पत्ता, फोन नंबर ही माहिती टाकायची आहे. आणि मग पेमेंट करायचं आहे.

पेमेंट झाल्याचा मेसेज तुम्हाला स्क्रीनवर दिसेल. यानंतर तुमच्या मोबाईलवर यूझरनेम आणि पासवर्ड पाठवला जाईल आणि तुमची नोंदणी पूर्ण होईल.

ही झाली या योजनेसाठीची ही प्राथमिक नोंदणी. तुमच्या जिल्ह्यातील कोटा उपलब्ध झाल्यावर अर्जदाराला तसं SMS द्वारे कळवण्यात येईल. त्यानंतर अर्जदाराची संपूर्ण माहिती भरणे, कोटेशन देणे, लाभार्थी हिस्सा स्वीकारणे, कंपनी निवडणे आणि सौर पंप वाटप करणे ही प्रक्रिया पूर्ण होईल, असं महाऊर्जाच्या वेबसाईटवर नमूद करण्यात आलं आहे.

पीएम कुसुम सोलार योजनेबाबत तुम्हाला काही प्रश्न किंवा अधिक माहितीसाठी तुम्ही 020-3500 0450 या क्रमांकावर संपर्क साधू शकता.