महाराष्ट्रात मॉन्सूनचा जोर वाढला; पालघर, पुणे घाटमाथ्यावर रेड अलर्ट, अनेक जिल्ह्यांत मुसळधार पावसाचा इशारा | Monsoon Update Maharashtra Weather

किसानवाणी : राज्यात नैऋत्य मोसमी वारे अधिक सक्रिय झाल्यामुळे पावसाचा जोर वाढू लागला आहे. विशेषतः कोकण किनारपट्टी, सह्याद्रीच्या घाटमाथ्यावरील भाग तसेच विदर्भातील काही जिल्ह्यांमध्ये पुढील २४ तासांत जोरदार (Monsoon Update Maharashtra Weather) ते अतिजोरदार पावसाची शक्यता हवामान विभागाने व्यक्त केली आहे. या पार्श्वभूमीवर पालघर आणि पुणे जिल्ह्यातील घाटमाथा परिसरासाठी रेड अलर्ट जारी करण्यात आला असून नागरिकांनी तसेच प्रशासनाने आवश्यक ती खबरदारी घेण्याचे आवाहन करण्यात आले आहे.

हवामान विभागाच्या माहितीनुसार, उत्तर बंगालच्या उपसागरात समुद्रसपाटीपासून सुमारे १.५ ते ७.६ किलोमीटर उंचीपर्यंत चक्राकार वाऱ्यांची स्थिती निर्माण झाली आहे. या प्रणालीच्या प्रभावामुळे ३ जुलैपर्यंत या भागात कमी दाबाचे क्षेत्र तयार होण्याची शक्यता आहे. त्याचबरोबर हंगामी कमी दाबाचा पट्टा पंजाबपासून उत्तर बंगालच्या उपसागरापर्यंत सक्रिय असून गुजरातपासून कर्नाटक किनारपट्टीपर्यंत किनाऱ्याला समांतर आणखी एक कमी दाबाचा पट्टा विस्तारला आहे. तसेच उत्तर बंगालच्या उपसागरापासून उत्तर मध्य महाराष्ट्र, गुजरात आणि आग्नेय अरबी समुद्रापर्यंत हवेचा कमी दाबाचा पट्टा सक्रिय असल्याने महाराष्ट्रात पावसासाठी पोषक वातावरण निर्माण झाले आहे.

गेल्या २४ तासांत कोकणात पावसाचा जोर अधिक वाढला असून अनेक ठिकाणी अतिवृष्टीची नोंद झाली आहे. पालघर जिल्ह्यातील वाडा येथे राज्यातील सर्वाधिक २३० मिलिमीटर पावसाची नोंद झाली. राज्यातील इतर भागांमध्येही मध्यम ते जोरदार स्वरूपाच्या पावसाच्या सरी कोसळत असून पुढील काही दिवस ही परिस्थिती कायम राहण्याची शक्यता हवामान विभागाने व्यक्त केली आहे.

आज (२ जुलै) पालघर आणि पुणे घाटमाथा परिसरात मुसळधार पावसाची शक्यता असल्याने रेड अलर्ट जारी करण्यात आला आहे. ठाणे, मुंबई, रायगड, रत्नागिरी, सातारा घाटमाथा आणि कोल्हापूर घाटमाथा येथे अतिजोरदार पावसाची शक्यता असल्याने ऑरेंज अलर्ट देण्यात आला आहे. तर अकोला, अमरावती, वर्धा, नागपूर, भंडारा आणि चंद्रपूर जिल्ह्यांमध्ये विजांसह जोरदार पावसाचा अंदाज व्यक्त करण्यात आला असून या जिल्ह्यांसाठीही ऑरेंज अलर्ट लागू आहे.

याशिवाय सिंधुदुर्ग, नाशिक आणि जळगाव जिल्ह्यांसाठी जोरदार पावसाचा येलो अलर्ट देण्यात आला आहे. धुळे, जळगाव, अहिल्यानगर, पुणे, छत्रपती संभाजीनगर, जालना, बीड, परभणी, हिंगोली, नांदेड, बुलडाणा, वाशीम, गोंदिया आणि गडचिरोली जिल्ह्यांमध्ये विजांच्या कडकडाटासह वादळी पावसाची शक्यता असल्याने नागरिकांनी सतर्क राहण्याचा सल्ला देण्यात आला आहे.

दरम्यान, नैऋत्य मोसमी वाऱ्यांची उत्तर भारताकडे प्रगतीही सुरूच आहे. मॉन्सूनने उत्तर अरबी समुद्र, संपूर्ण हिमाचल प्रदेश, लडाख, जम्मू-काश्मीर तसेच गुजरात, मध्य प्रदेश, उत्तर प्रदेशचा काही भाग, हरियाना आणि पंजाबच्या काही भागात पुढे सरकला आहे. पुढील दोन दिवसांत दिल्ली आणि राजस्थानसह उत्तर भारतातील आणखी काही भागांमध्ये मॉन्सून दाखल होण्याची शक्यता हवामान विभागाने व्यक्त केली आहे.

बुधवारी सकाळपर्यंतच्या २४ तासांतील तापमानाच्या नोंदीनुसार धुळे येथील कृषी महाविद्यालयात राज्यातील सर्वाधिक ३५ अंश सेल्सिअस कमाल तापमान नोंदविण्यात आले. तर महाबळेश्वर येथे राज्यातील सर्वात कमी १६.६ अंश सेल्सिअस किमान तापमानाची नोंद झाली.

विभागनिहाय सरासरी तापमान : Monsoon Update Maharashtra Weather

आजचे हवामान अलर्ट