महाराष्ट्रात पावसाचा जोर ओसरणार; पुणे-सातारा घाटमाथ्यावर ऑरेंज अलर्ट, ‘या’ जिल्ह्यांना येलो अलर्ट | Maharashtra Weather Monsoon Rain Forecast

किसानवाणी : महाराष्ट्रात गेल्या काही दिवसांपासून कोसळत असलेल्या मुसळधार पावसाचा ( Maharashtra Weather Monsoon Rain Forecast) जोर आता हळूहळू कमी होण्याची चिन्हे दिसत आहेत. मात्र, राज्यातील काही भागांमध्ये अद्यापही जोरदार ते अति जोरदार पावसाची शक्यता कायम असल्याने हवामान विभागाने सतर्कतेचा इशारा दिला आहे. विशेषतः पुणे आणि सातारा जिल्ह्यांच्या घाटमाथा परिसरात आज (ता. ८) अति जोरदार पावसाची शक्यता असल्यामुळे ऑरेंज अलर्ट जारी करण्यात आला आहे. याशिवाय पालघर, रायगड, रत्नागिरी तसेच कोल्हापूर जिल्ह्यांच्या घाटमाथा भागात जोरदार पावसाचा येलो अलर्ट देण्यात आला असून, विदर्भातील काही जिल्ह्यांमध्ये विजांसह पावसाचा अंदाज व्यक्त करण्यात आला आहे.

हवामान विभागाच्या माहितीनुसार, हंगामी कमी दाबाचा पट्टा मंगळवारी (ता. ७) नैर्ऋत्य राजस्थानपासून बांगलादेशापर्यंत विस्तारलेला होता. याशिवाय दक्षिण गुजरात आणि केरळच्या किनारपट्टीलगत कमी दाबाचा पट्टा कायम असून, आग्नेय अरबी समुद्रापासून गुजरातमार्गे कमी दाबाच्या केंद्रापर्यंत आणि पुढे बांगलादेशापर्यंत हवेचा कमी दाबाचा पट्टा तयार झाला आहे. या हवामान प्रणालींमुळे गेल्या काही दिवसांत राज्यात जोरदार पाऊस झाला असला, तरी आता त्यांची तीव्रता कमी होत असल्याने पावसाचा जोर ओसरण्याची शक्यता वर्तविण्यात आली आहे.

मंगळवारी सकाळी ८.३० वाजेपर्यंतच्या २४ तासांत कोकण आणि घाटमाथा परिसरात अतिवृष्टीची नोंद झाली. अनेक ठिकाणी ३०० मिलिमीटरपेक्षा अधिक पाऊस झाला. पुणे आणि रायगड जिल्ह्यांतील लोणावळा, ताम्हिणी आणि भिरा येथे ५०० मिलिमीटरपेक्षा अधिक पाऊस नोंदविण्यात आला. तर घाटमाथ्यावरील दावडी येथे यंदाच्या हंगामातील राज्यातील सर्वाधिक ६८८ मिलिमीटर पावसाची नोंद झाली. राज्यातील इतर भागांमध्ये हलक्या ते जोरदार सरी कोसळल्या.

तापमानाचा विचार केला असता, नागपूर, जळगाव आणि वर्धा येथे राज्यातील उच्चांकी ३३.६ अंश सेल्सिअस कमाल तापमानाची नोंद झाली, तर महाबळेश्वर येथे राज्यातील नीचांकी १८.४ अंश सेल्सिअस किमान तापमान नोंदविण्यात आले.

दरम्यान, नैर्ऋत्य मोसमी वाऱ्यांनी गुजरातमधील उर्वरित भाग, अरबी समुद्र तसेच राजस्थानच्या आणखी काही भागांमध्ये प्रगती केली आहे. हवामान विभागाच्या अंदाजानुसार पुढील दोन ते तीन दिवसांत मॉन्सून राजस्थान, हरियाना, पंजाबसह देशाच्या उर्वरित भागातही पोहोचण्याची शक्यता आहे. त्यामुळे लवकरच संपूर्ण देश मॉन्सूनच्या प्रभावाखाली येणार आहे.

बंगालच्या उपसागरात तयार झालेले कमी दाबाचे क्षेत्र जमिनीवर आल्यानंतर त्याची तीव्रता कमी झाली असून, मंगळवारी ही प्रणाली पूर्व मध्य प्रदेशावर होती. आज (ता. ८) ही प्रणाली उत्तर प्रदेशच्या दिशेने सरकत निवळण्याची शक्यता हवामान विभागाने व्यक्त केली आहे. यामुळे राज्यातील मुसळधार पावसाचा जोरही कमी होण्याचा अंदाज आहे.

आजचे हवामान अलर्ट : Maharashtra Weather Monsoon Rain Forecast

राज्यातील प्रमुख तापमान (°C) : Maharashtra Weather Monsoon Rain Forecast