Monsoon Rain | राज्यात पावसाला पोषक हवामान; ‘या’ जिल्ह्यांत विजांसह पावसाची शक्यता

किसानवाणी : राज्यात सध्या ऊन-सावल्यांचा खेळ सुरू असला तरी पावसाला पोषक (Monsoon Rain) हवामान तयार होत असल्याचे चित्र आहे. अनेक भागांत पावसाने तात्पुरती उघडीप दिल्यामुळे उन्हाचा चटका आणि उकाडा वाढला असून कमाल तापमान काही ठिकाणी ३७ अंश सेल्सिअसपर्यंत पोहोचले आहे. हवामान विभागाने मंगळवार (ता. १४) रोजी कोकण, मध्य महाराष्ट्र आणि मराठवाड्यातील काही भागांत विजांसह पावसाची शक्यता व्यक्त केली आहे. उर्वरित राज्यात बहुतांश ठिकाणी पावसाची उघडीप कायम राहण्याचा, तर काही ठिकाणी हलक्या स्वरूपाच्या सरी पडण्याचा अंदाज वर्तविण्यात आला आहे.

सध्या मॉन्सूनच्या हालचालींना पोषक वातावरण तयार होत आहे. मॉन्सूनचा कमी दाबाचा पट्टा राजस्थानातील श्रीगंगानगरपासून हिस्सार, गोरखपूर, मुझफ्फरपूर मार्गे मणिपूरपर्यंत सक्रिय आहे. तसेच उत्तर बंगालचा उपसागर आणि दक्षिण बांग्लादेश परिसरावर समुद्रसपाटीपासून सुमारे ४.५ ते ५.८ किलोमीटर उंचीवर चक्राकार वारे वाहत आहेत. बिहारपासून मणिपूरपर्यंत हवेचा कमी दाबाचा पट्टाही तयार झाला असून त्यामुळे वातावरणात आर्द्रतेचे प्रमाण वाढण्यास मदत होत आहे.

सोमवारी (ता. १३) सकाळपर्यंतच्या २४ तासांमध्ये जळगाव येथे राज्यातील सर्वाधिक ३७.० अंश सेल्सिअस कमाल तापमानाची नोंद झाली. तर महाबळेश्वर येथे राज्यातील सर्वात कमी १७.४ अंश सेल्सिअस किमान तापमान नोंदविण्यात आले. सध्या राज्यातील अनेक भागांमध्ये कमाल तापमान ३३ ते ३७ अंश सेल्सिअसच्या दरम्यान असून, उन्हामुळे उकाड्यात लक्षणीय वाढ झाली आहे.

हवामान विभागाच्या अंदाजानुसार आज (ता. १४) कोकणातील पालघर आणि रायगड, मध्य महाराष्ट्रातील नंदुरबार, धुळे, जळगाव, नाशिक घाटमाथा आणि पुणे घाटमाथा, तसेच मराठवाड्यातील छत्रपती संभाजीनगर आणि जालना जिल्ह्यांमध्ये तुरळक ठिकाणी विजांसह पावसाची शक्यता आहे. उर्वरित राज्यात बहुतांश भागांत पावसाची उघडीप राहील. मात्र ऊन-सावल्यांच्या वातावरणात काही ठिकाणी हलक्या सरी पडू शकतात. त्याचबरोबर पुढील काही दिवस उन्हाचा चटका आणि उकाडाही कायम राहण्याची शक्यता हवामान विभागाने व्यक्त केली आहे.

राज्यातील प्रमुख शहरांचे तापमान (सोमवार, ता. १३ – सकाळी ८.३० वाजेपर्यंत) : Monsoon Rain

विभागनिहाय तापमान (अंश सेल्सिअस)

विजांसह पावसाची शक्यता असलेले प्रमुख जिल्हे

जालना

पालघर

रायगड

नंदुरबार

धुळे

जळगाव

नाशिक (घाटमाथा)

पुणे (घाटमाथा)

छत्रपती संभाजीनगर