कोकणात मुसळधार पावसाचा इशारा; राज्यातील अनेक जिल्ह्यांना येलो अलर्ट… |Maharashtra Weather Rain Alert

किसानवाणी : राज्यात मान्सूनपूर्व पावसाच्या हालचालींना वेग आला असून हवामान विभागाने आज (४ जून) कोकणासह राज्यातील अनेक भागांसाठी पावसाचा इशारा दिला आहे. विशेषतः मुंबई, रायगड आणि सिंधुदुर्ग जिल्ह्यांत जोरदार पावसाची शक्यता व्यक्त करण्यात आली असून या भागांसाठी येलो अलर्ट जारी करण्यात आला आहे. दरम्यान, राज्यातील (Maharashtra Weather Rain Alert) इतर अनेक जिल्ह्यांत वादळी वाऱ्यांसह पावसाची शक्यता असल्याने नागरिकांनी आणि शेतकऱ्यांनी सतर्क राहण्याचे आवाहन करण्यात आले आहे.

मॉन्सून केरळमध्ये दाखल होण्यासाठी पोषक परिस्थिती निर्माण झाली असतानाच महाराष्ट्रात पूर्वमोसमी सरींची सुरुवात झाली आहे. हवामान विभागाच्या माहितीनुसार अरबी समुद्रात केरळ किनारपट्टीलगत समुद्रसपाटीपासून ३.१ ते ५.८ किलोमीटर उंचीवर चक्राकार वाऱ्यांची स्थिती निर्माण झाली आहे. तसेच उत्तर अंदमान समुद्रात ३.१ ते ७.६ किलोमीटर दरम्यान चक्राकार वारे सक्रिय आहेत. मध्य प्रदेश आणि छत्तीसगड परिसरावरही चक्राकार वाऱ्यांचे क्षेत्र तयार झाले असून त्यापासून विदर्भ, तेलंगणा, रायलसीमा ते उत्तर तमिळनाडूपर्यंत कमी दाबाचा पट्टा कायम आहे. या सर्व हवामान प्रणालींच्या प्रभावामुळे राज्यात पावसासाठी पोषक वातावरण निर्माण झाले आहे.

बुधवारी सकाळपर्यंतच्या २४ तासांत तेलंगणातील खम्मम येथे देशातील सर्वाधिक ४३ अंश सेल्सिअस तापमानाची नोंद झाली. महाराष्ट्रातही उष्णतेची लाट कायम असून ब्रह्मपुरी आणि वर्धा येथे राज्यातील उच्चांकी ४२ अंश सेल्सिअस तापमान नोंदविण्यात आले. चंद्रपूर, अकोला आणि भंडारा येथे तापमान ४१ अंशांच्या पुढे गेले, तर जळगाव, मालेगाव आणि नागपूर येथे तापमान ४० अंशांपेक्षा अधिक राहिले. दुसरीकडे महाबळेश्वर येथे राज्यातील नीचांकी १८.७ अंश सेल्सिअस तापमानाची नोंद झाली.

आज मुंबईसह रायगड आणि सिंधुदुर्ग जिल्ह्यांत जोरदार पावसाच्या सरी कोसळण्याची शक्यता आहे. याशिवाय पालघर, ठाणे, रत्नागिरी, नंदूरबार, धुळे, नाशिक, अहिल्यानगर, पुणे, सातारा, कोल्हापूर, बीड, धाराशिव, लातूर, परभणी, हिंगोली, नांदेड, नागपूर, चंद्रपूर, यवतमाळ आणि गडचिरोली या जिल्ह्यांत वादळी पावसाचा अंदाज वर्तविण्यात आला आहे. या सर्व जिल्ह्यांसाठी येलो अलर्ट जारी करण्यात आला आहे.

विदर्भातील वर्धा जिल्ह्यासाठी मात्र अधिक गंभीर परिस्थितीचा इशारा देण्यात आला आहे. येथे जोरदार वादळी पावसाची शक्यता असल्याने हवामान विभागाने ऑरेंज अलर्ट जारी केला आहे. या भागात विजांच्या कडकडाटासह मुसळधार पाऊस आणि वेगवान वाऱ्यांची शक्यता असल्याचे सांगण्यात आले आहे.

दरम्यान, मॉन्सूनची प्रगतीही लक्षवेधी ठरत आहे. ३० मे रोजी मॉन्सूनने लक्षद्वीप बेटे, अरबी समुद्राचा काही भाग, कोमोरिन परिसर तसेच बंगालच्या उपसागरातील काही भाग व्यापला होता. त्यानंतर प्रगतीची सीमा काही दिवस स्थिर राहिली. मात्र आज केरळ, तमिळनाडूचा काही भाग, अरबी समुद्र, लक्षद्वीप बेटे आणि बंगालच्या उपसागरातील आणखी काही भागांत मॉन्सून दाखल होण्यासाठी हवामान अनुकूल असल्याचे हवामान विभागाने स्पष्ट केले आहे.

राज्यातील प्रमुख शहरांतील तापमान पाहता जळगाव येथे कमाल ४०.७ अंश, मालेगाव येथे ४०.८ अंश, नागपूर येथे ४०.७ अंश, अकोला व भंडारा येथे ४१ अंश, तर ब्रह्मपुरी आणि वर्धा येथे ४२ अंश सेल्सिअस तापमान नोंदविण्यात आले. कोल्हापूरमध्ये कमाल तापमान ३६.७ अंश, पुण्यात ३७.३ अंश आणि सांगलीत ३८ अंश सेल्सिअस नोंदले गेले.

हवामान विभागाने दिलेल्या इशाऱ्यानुसार राज्यात पुढील काही दिवस उष्णता आणि उकाडा कायम राहण्याची शक्यता असून त्याचवेळी अनेक भागांत वादळी पावसाच्या सरीही अनुभवास येऊ शकतात. त्यामुळे शेतकरी, प्रवासी आणि नागरिकांनी हवामानातील बदल लक्षात घेऊन आवश्यक खबरदारी घेण्याचे आवाहन करण्यात आले आहे.

हवामान विभागाचे अलर्ट : Maharashtra Weather Rain Alert

सर्वाधिक तापमानाची नोंद : Maharashtra Weather Rain Alert