Rain Alert Maharashtra Rain Forecast | राज्यात विजांसह वादळी पावसाचा इशारा; 'या' 3 जिल्ह्यांना येलो अलर्ट, IMD चा अंदाज

ही माहिती सर्व शेतकरी बांधवांपर्यंत पोहचवा

किसानवाणी : उन्हाचा चटका दिवसेंदिवस वाढत असतानाच महाराष्ट्रात पुन्हा एकदा पावसाला पोषक वातावरण तयार होत असल्याचे चित्र आहे. भारतीय हवामान विभागाने (Rain Alert Maharashtra Rain Forecast) गुरुवार, १६ जुलै रोजी राज्यातील काही भागांत विजांच्या कडकडाटासह हलक्या ते मध्यम स्वरूपाच्या पावसाचा अंदाज व्यक्त केला आहे. विशेषतः मध्य महाराष्ट्र आणि मराठवाड्यातील काही जिल्ह्यांमध्ये सोसाट्याच्या वाऱ्यासह वादळी पावसाची शक्यता असल्याने नागरिकांनी आणि शेतकऱ्यांनी सतर्क राहण्याचे आवाहन करण्यात आले आहे.

हवामान विभागाच्या अंदाजानुसार कोकण, मध्य महाराष्ट्र आणि मराठवाड्यातील अनेक भागांत तुरळक ठिकाणी विजांसह हलक्या पावसाच्या सरी पडू शकतात. मात्र, विदर्भात उष्णतेचा प्रभाव कायम राहणार असून, तेथे उन्हाचा चटका आणि उकाडा जाणवत राहण्याची शक्यता आहे.

सध्या देशातील हवामानावर परिणाम करणाऱ्या विविध प्रणाली सक्रिय झाल्या आहेत. मॉन्सूनचा आस असलेला कमी दाबाचा पट्टा जम्मूपासून देहरादून, शाहजहानपूर, पटना, बंकुरा आणि पूर्व-मध्य बंगालच्या उपसागरातील कमी दाबाच्या केंद्रापर्यंत सक्रिय आहे. तसेच पूर्व उत्तर प्रदेश आणि बिहार परिसरावर समुद्रसपाटीपासून सुमारे ९०० मीटर उंचीवर चक्राकार वाऱ्यांची स्थिती आहे. गुजरात परिसरावर ३.१ ते ५.८ किलोमीटर उंचीवर, तर उत्तर प्रदेश परिसरावर समुद्रसपाटीपासून ५.८ किलोमीटर उंचीवर चक्राकार वाऱ्यांची स्थिती निर्माण झाली आहे. या सर्व हवामान प्रणालींचा परिणाम महाराष्ट्रातील वातावरणावर होत असून त्यामुळे काही भागांत पावसासाठी अनुकूल परिस्थिती तयार झाली आहे.

बुधवार, १५ जुलै रोजी सकाळपर्यंतच्या २४ तासांत राज्यातील सर्वाधिक कमाल तापमान धुळे येथील कृषी महाविद्यालयात ३७ अंश सेल्सिअस इतके नोंदविण्यात आले. तर महाबळेश्वर येथे राज्यातील सर्वात कमी १७.५ अंश सेल्सिअस तापमानाची नोंद झाली. राज्यातील अनेक भागांत कमाल तापमान ३३ ते ३७ अंश सेल्सिअसदरम्यान असल्याने उष्णतेची लाट नसली तरी उकाडा आणि उन्हाचा त्रास कायम आहे. काही भागांत ढगाळ वातावरण तयार होत असून अधूनमधून हलक्या सरीही पडत आहेत.

हवामान विभागाने सातारा, सोलापूर आणि धाराशिव जिल्ह्यांसाठी विजांच्या कडकडाटासह सोसाट्याचा वारा आणि वादळी पावसाची शक्यता लक्षात घेऊन येलो अलर्ट जारी केला आहे. या जिल्ह्यांतील नागरिकांनी हवामानातील बदल लक्षात घेऊन आवश्यक ती खबरदारी घेण्याचे आवाहन करण्यात आले आहे.

याशिवाय पालघर, ठाणे, मुंबई, रायगड, रत्नागिरी, नाशिक, अहिल्यानगर, पुणे, सांगली, बीड, लातूर, परभणी, हिंगोली आणि नांदेड या जिल्ह्यांमध्येही विजांसह हलक्या पावसाची शक्यता हवामान विभागाने वर्तविली आहे. उर्वरित राज्यात काही ठिकाणी हलक्या सरी पडू शकतात, मात्र उष्ण आणि दमट वातावरण कायम राहण्याचा अंदाज आहे.

दरम्यान, बंगालच्या उपसागरात ओडिशा आणि पश्चिम बंगालच्या किनारपट्टीलगत कमी दाबाचे क्षेत्र तयार झाले आहे. या प्रणालीसोबत समुद्रसपाटीपासून सुमारे ७.६ किलोमीटर उंचीपर्यंत चक्राकार वाऱ्यांची स्थिती निर्माण झाली असून, १७ जुलैपर्यंत ही प्रणाली आणखी तीव्र होण्याची शक्यता हवामान विभागाने व्यक्त केली आहे. या प्रणालीच्या पुढील हालचालींवर राज्यातील आगामी हवामान अवलंबून राहणार आहे.

जिल्हानिहाय हवामानाचा अंदाज : Rain Alert Maharashtra Rain Forecast

विभाग	जिल्हे
येलो अलर्ट (वादळी पाऊस, विजा व सोसाट्याचा वारा)	सातारा, सोलापूर, धाराशिव
विजांसह हलक्या पावसाची शक्यता	पालघर, ठाणे, मुंबई, रायगड, रत्नागिरी, नाशिक, अहिल्यानगर, पुणे, सांगली, बीड, लातूर, परभणी, हिंगोली, नांदेड