किसानवाणी : देशांतर्गत बाजारपेठेत बेदाण्याला सातत्याने चांगली मागणी आणि (Raisin Prices Market) उठाव मिळत असल्याने गेल्या दोन महिन्यांपासून बेदाण्याचे दर स्थिर राहिले आहेत. आगामी पंधरा ते वीस दिवसांत देशभरात विविध सण-उत्सवांना सुरुवात होणार असल्याने व्यापाऱ्यांकडून बेदाणा खरेदीला आणखी वेग येण्याची शक्यता व्यक्त केली जात आहे. त्यामुळे पुढील काळातही बेदाण्याचे दर टिकून राहतील, असा विश्वास बेदाणा उद्योगातील जाणकारांनी व्यक्त केला आहे.
राज्यात २०२४-२५ या हंगामात सुमारे १ लाख ७० हजार टन बेदाण्याचे उत्पादन झाले होते. तर २०२५-२६ या हंगामात उत्पादनात लक्षणीय वाढ होऊन ते सुमारे २ लाख टनांपर्यंत पोहोचले आहे. यामध्ये सर्वाधिक उत्पादन सांगली जिल्ह्यात झाले असून, राज्यातील प्रमुख बेदाणा उत्पादक पट्ट्यांमध्ये यंदा उत्पादन चांगले राहिले आहे.
गतवर्षी मे महिन्यापासून झालेल्या अतिवृष्टीमुळे द्राक्षबागांना मोठा फटका बसला होता. त्यामुळे यंदा बेदाणा उत्पादनात घट होईल, असा अंदाज सुरुवातीला व्यक्त करण्यात आला होता. मात्र द्राक्ष हंगाम सुरू झाल्यानंतर परिस्थिती बदलली. पश्चिम आशियातील युद्धामुळे द्राक्ष निर्यातीवर परिणाम झाला. त्याचबरोबर देशांतर्गत बाजारात द्राक्षाचे दर घसरल्याने अनेक उत्पादकांनी ताजी द्राक्षे विकण्याऐवजी त्यापासून बेदाणा तयार करण्याचा निर्णय घेतला. परिणामी यंदा बेदाणा उत्पादनात सुमारे २० ते २५ टक्क्यांनी वाढ झाली.
दरवर्षी जानेवारी-फेब्रुवारी महिन्यात बेदाणा निर्मितीचा हंगाम सुरू होतो. मात्र यंदा अतिवृष्टीच्या परिणामामुळे हंगाम जवळपास २५ दिवस उशिराने सुरू झाला. सुरुवातीच्या पंधरा ते वीस दिवसांत द्राक्षाचे उत्पादन कमी असल्याने बेदाणा निर्मितीचा वेग मंदावला होता. त्यानंतर द्राक्ष उत्पादन वाढत गेल्याने बेदाणा निर्मितीलाही गती मिळाली. हंगामाच्या सुरुवातीपासूनच बाजारात बेदाण्याला समाधानकारक दर मिळत होते. मे आणि जून महिन्यात दरात काहीशी घसरण झाली असली तरी त्यानंतर बाजारात पुन्हा सुधारणा झाली आणि सध्या दर स्थिर आहेत.
सध्या दर्जेदार बेदाण्याला देशांतर्गत बाजारात चांगली मागणी आहे. आगामी सणासुदीच्या पार्श्वभूमीवर व्यापाऱ्यांनी खरेदीचे नियोजन सुरू केले असून, त्यामुळे बाजारातील व्यवहार आणखी वाढण्याची शक्यता आहे. सध्या दर्जानुसार बेदाण्याला प्रतिकिलो २८० ते ४०० रुपयांपर्यंत दर मिळत असून, गतवर्षीच्या तुलनेत यंदाचे दर उत्पादकांसाठी अधिक समाधानकारक ठरत आहेत.
उत्पादनाच्या तुलनेत विक्रीचाही वेग चांगला राहिला आहे. यंदाच्या सुमारे २ लाख टन उत्पादनापैकी आजअखेर अंदाजे ८० हजार ते १ लाख टन बेदाण्याची विक्री झाली आहे. सध्या बाजारात अंदाजे १ लाख ते १ लाख २० हजार टन बेदाणा शिल्लक असून, आगामी सणासुदीच्या मागणीमुळे या साठ्याची विक्री आणखी वेगाने होण्याची शक्यता आहे.
हे वाचा : Rain Alert Maharashtra Rain Forecast | राज्यात विजांसह वादळी पावसाचा इशारा; ‘या’ 3 जिल्ह्यांना येलो अलर्ट, IMD चा अंदाज
Farmer ID 2026: महाराष्ट्रातील शेतकऱ्यांसाठी Farmer ID अनिवार्य? मोफत नोंदणीची संपूर्ण प्रक्रिया, पात्रता आणि आवश्यक कागदपत्रे | Farmer ID 2026 Agristack Maharashtra
बेदाण्याचे सध्याचे प्रतिकिलो बाजारभाव : Raisin Prices Market
| बेदाण्याचा प्रकार | प्रतिकिलो दर (रुपये) |
|---|---|
| हिरवा बेदाणा | २७० ते ४०० |
| पिवळा बेदाणा | २८० ते ३५० |
| काळा बेदाणा | ७० ते १५० |
बाजारातील सध्याची परिस्थिती पाहता देशांतर्गत मागणी मजबूत असल्यामुळे बेदाण्याचे दर पुढील काही काळ स्थिर राहण्याची शक्यता आहे. विशेषतः सण-उत्सवांच्या काळात व्यापाऱ्यांकडून होणारी वाढीव खरेदी उत्पादकांसाठी दिलासादायक ठरण्याची अपेक्षा व्यक्त केली जात आहे.