किसानवाणी : राज्यातील प्रयोगशील शेतकऱ्यांना प्रोत्साहन देण्यासाठी(Kharif Crop Competition)आणि अधिक उत्पादन देणाऱ्या आधुनिक शेती तंत्रज्ञानाचा प्रसार करण्याच्या उद्देशाने कृषी विभागामार्फत दरवर्षी राज्यांतर्गत पीकस्पर्धा योजना राबविण्यात येते. खरीप हंगाम २०२६-२७ साठी अन्नधान्य, कडधान्य आणि गळीतधान्य पिकांची पीकस्पर्धा जाहीर करण्यात आली असून, त्याअंतर्गत मूग आणि उडीद पिकांच्या स्पर्धेसाठी अर्ज करण्याची अंतिम तारीख ३१ जुलै २०२६ आहे. त्यामुळे या स्पर्धेत सहभागी होऊ इच्छिणाऱ्या शेतकऱ्यांकडे अर्ज करण्यासाठी आता केवळ तीन दिवसांचा कालावधी शिल्लक आहे.
राज्यातील विविध भागांतील अनेक शेतकरी सातत्याने शेतीत नवनवीन प्रयोग करत असतात. कमी खर्चात अधिक उत्पादन, सुधारित तंत्रज्ञानाचा वापर, आधुनिक शेती पद्धती आणि नाविन्यपूर्ण व्यवस्थापनामुळे अनेक शेतकरी इतरांसाठी प्रेरणादायी ठरत आहेत. अशा शेतकऱ्यांच्या कार्याचा गौरव करणे, त्यांचे मनोबल वाढविणे आणि त्यांच्या अनुभवाचा लाभ इतर शेतकऱ्यांपर्यंत पोहोचविणे हा या पीकस्पर्धेचा मुख्य उद्देश आहे. या माध्यमातून राज्यातील एकूण कृषी उत्पादन वाढीसही चालना मिळावी, अशी कृषी विभागाची अपेक्षा आहे.
यंदाच्या खरीप हंगामापासून पीकस्पर्धेच्या अर्ज प्रक्रियेत महत्त्वपूर्ण बदल करण्यात आला आहे. यापूर्वी संपूर्ण प्रक्रिया ऑफलाइन पद्धतीने पार पडत होती. मात्र, प्रशासकीय कामकाजात अधिक पारदर्शकता, वेग आणि सुलभता आणण्यासाठी खरीप हंगाम २०२६ पासून अर्ज स्वीकारण्यासाठी स्वतंत्र ऑनलाइन प्रणाली सुरू करण्यात आली आहे. त्यामुळे शेतकऱ्यांना आता ऑनलाइन पद्धतीने अर्ज सादर करता येणार आहेत.
यंदाच्या स्पर्धेत एकूण ११ खरीप पिकांचा समावेश करण्यात आला आहे. या स्पर्धेत तालुका, जिल्हा आणि राज्य अशा तीन स्तरांवर विजेत्यांची निवड करण्यात येणार आहे. सर्वसाधारण तसेच आदिवासी गटातील पात्र शेतकऱ्यांना या स्पर्धेत सहभागी होता येणार असून, तालुकास्तरावरील उत्पादकतेच्या आधारे पुढील स्तरावरील विजेत्यांची निवड केली जाईल.
खरीप पीकस्पर्धेत समाविष्ट पिके : Kharif Crop Competition
| पिकांची नावे |
|---|
| भात |
| ज्वारी |
| बाजरी |
| मका |
| नाचणी (रागी) |
| तूर |
| मूग |
| उडीद |
| सोयाबीन |
| भुईमूग |
| सूर्यफूल |
पात्रता निकष
| निकष | माहिती |
|---|---|
| जमीन | शेतकऱ्याच्या स्वतःच्या नावावर असावी आणि ती स्वतः कसत असावा |
| सहभाग | एकाच वेळी एकापेक्षा अधिक पिकांसाठी अर्ज करता येईल |
| किमान क्षेत्र | भातासाठी २० गुंठे, इतर सर्व पिकांसाठी सलग ४० गुंठे लागवड आवश्यक |
अर्जासाठी आवश्यक कागदपत्रे
- फार्मर आयडी
- प्रवेश शुल्क भरल्याचे चलन
- आदिवासी गटासाठी जात प्रमाणपत्र
- बँक खाते चेक किंवा पासबुकच्या पहिल्या पानाची छायांकित प्रत
अर्जाची अंतिम मुदत
| पीक | अंतिम तारीख |
|---|---|
| मूग व उडीद | ३१ जुलै २०२६ |
| भात, ज्वारी, बाजरी, मका, नाचणी (रागी), तूर, सोयाबीन, भुईमूग व सूर्यफूल | ३१ ऑगस्ट २०२६ |
हेही वाचा : EL Niño 2026 | एल निनो आणखी तीव्र होणार; १९५० नंतरचा सर्वात शक्तिशाली ठरण्याची शक्यता, ऑस्ट्रेलियाचा इशारा
कर्जमाफीच्या १७ लाख लाभार्थ्यांची यादी जाहीर; तुमचे नाव आहे का? जिल्हानिहाय यादी पाहा | Farm Loan Waiver List
मूग आणि उडीद पिकांसाठी अर्ज करण्याची मुदत ३१ जुलैपर्यंतच असल्याने या दोन पिकांच्या उत्पादक शेतकऱ्यांनी वेळ न दवडता ऑनलाइन अर्ज सादर करणे आवश्यक आहे. इतर पिकांसाठी ३१ ऑगस्टपर्यंत मुदत उपलब्ध असली तरी मूग आणि उडीद स्पर्धेसाठी मुदत वाढविण्यात आलेली नाही. त्यामुळे या स्पर्धेत सहभागी होण्याची इच्छा असलेल्या होतकरू शेतकऱ्यांनी आवश्यक कागदपत्रांची पूर्तता करून निर्धारित मुदतीत अर्ज दाखल करावा, असे आवाहन कृषी विभागाने केले आहे.