राज्यात पावसाचा जोर वाढणार; 7 जिल्ह्यांना रेड अलर्ट, अनेक ठिकाणी मुसळधार पावसाचा इशारा | Maharashtra Rain IMD Forecast 2026

किसानवाणी : राज्यात पुन्हा एकदा पावसाचा जोर वाढण्याची चिन्हे दिसत असून, हवामान विभागाने (Maharashtra Rain IMD Forecast 2026) कोकण आणि घाटमाथा परिसरासाठी अतिजोरदार पावसाचा इशारा जारी केला आहे. गेल्या काही दिवसांपासून कोकण, घाटमाथा आणि राज्यातील विविध भागांमध्ये पावसाची तीव्रता वाढली असून अनेक ठिकाणी अतिवृष्टीची नोंद झाली आहे. आज (४ जुलै) विशेषतः पालघर, मुंबई, ठाणे, रायगड, नाशिक घाटमाथा, पुणे घाटमाथा आणि सातारा घाटमाथा या भागांसाठी रेड अलर्ट जारी करण्यात आला आहे. या भागांमध्ये मुसळधार ते अतिमुसळधार पाऊस होण्याची शक्यता व्यक्त करण्यात आली आहे.

हवामान विभागाच्या माहितीनुसार, दक्षिण कोकण, उत्तर महाराष्ट्र तसेच विदर्भातील काही जिल्ह्यांमध्येही जोरदार ते अतिजोरदार पावसाची शक्यता असल्याने ऑरेंज अलर्ट देण्यात आला आहे. उर्वरित राज्यातील अनेक भागांत विजांच्या कडकडाटासह पावसाचा अंदाज असल्यामुळे येलो अलर्टही लागू करण्यात आला आहे.

सध्या वातावरणात अनेक हवामान प्रणाली सक्रिय आहेत. राजस्थानपासून बंगालच्या उपसागरातील कमी दाबाच्या क्षेत्रापर्यंत हंगामी कमी दाबाचा पट्टा सक्रिय असून महाराष्ट्र आणि कर्नाटकच्या किनारपट्टीलगत आणखी एक कमी दाबाचा पट्टा कायम आहे. याशिवाय उत्तर बंगालच्या उपसागरापासून उत्तर मध्य महाराष्ट्र, गुजरातमार्गे आग्नेय अरबी समुद्रापर्यंत हवेचा कमी दाबाचा पट्टा पसरलेला आहे. महाराष्ट्राच्या उत्तर भागात समुद्रसपाटीपासून ३.१ ते ७.६ किलोमीटर उंचीवर परस्परविरोधी वाऱ्यांचे जोड क्षेत्र सक्रिय असल्याने पावसासाठी अनुकूल परिस्थिती निर्माण झाली आहे.

उत्तर ओडिशा आणि पश्चिम बंगालच्या किनाऱ्यालगत सध्या कमी दाबाचे क्षेत्र सक्रिय असून त्याच्याशी संबंधित चक्राकार वाऱ्यांची स्थिती समुद्रसपाटीपासून सुमारे ७.६ किलोमीटर उंचीपर्यंत निर्माण झाली आहे. पुढील दोन दिवसांत या प्रणालीची तीव्रता वाढण्याची शक्यता हवामान विभागाने वर्तवली आहे. त्यामुळे महाराष्ट्रासह मध्य भारतातील अनेक भागांमध्ये पावसाचा जोर आणखी वाढू शकतो.

गुरुवारी सकाळपर्यंतच्या २४ तासांत राज्यातील सर्वाधिक कमाल तापमान धुळे कृषी महाविद्यालय येथे ३५ अंश सेल्सिअस इतके नोंदविण्यात आले. तर महाबळेश्वर येथे राज्यातील सर्वात कमी १७.८ अंश सेल्सिअस किमान तापमानाची नोंद झाली. दरम्यान, घाटमाथ्यावर पावसाचा सर्वाधिक प्रभाव दिसून आला असून भिरा येथे तब्बल २१० मिलिमीटर पावसाची नोंद झाली आहे. उर्वरित राज्यातही हलक्या ते मध्यम आणि काही ठिकाणी जोरदार पावसाच्या सरी कोसळत आहेत.

देशभरातील मॉन्सूनची स्थितीही वेगाने पुढे सरकत आहे. नैर्ऋत्य मोसमी वाऱ्यांनी देशाचा बहुतांश भाग व्यापला असून उत्तर अरबी समुद्र, गुजरातचा आणखी काही भाग, संपूर्ण मध्य प्रदेश तसेच हरियाणा आणि राजस्थानच्या काही भागांमध्ये मॉन्सूनने प्रगती केली आहे. पुढील चार ते पाच दिवसांत संपूर्ण पंजाब, हरियाणा तसेच गुजरात, राजस्थान आणि अरबी समुद्राच्या उर्वरित भागातही मॉन्सून पोहोचण्याची शक्यता व्यक्त करण्यात आली आहे.

प्रमुख शहरांतील तापमान : Maharashtra Rain IMD Forecast 2026

जिल्हानिहाय हवामान इशारे