कृषी पायाभूत सुविधा निधी योजनेसाठी २० जुलैपर्यंत विशेष मोहीम; २ कोटींच्या कर्जावर ३% व्याज सवलत | Agriculture Infrastructure Fund

किसानवाणी : भारत सरकारच्या कृषी व शेतकरी कल्याण मंत्रालयामार्फत राबविण्यात येणाऱ्या कृषी पायाभूत सुविधा निधी ( Agriculture Infrastructure Fund) योजनेच्या प्रभावी अंमलबजावणीसाठी देशभरात २० जुलैपर्यंत विशेष मोहीम राबविण्यात येत आहे. या मोहिमेच्या माध्यमातून अधिकाधिक पात्र शेतकरी, शेतकरी उत्पादक कंपन्या (FPO), सहकारी संस्था, कृषी उद्योजक आणि इतर लाभार्थ्यांनी या योजनेचा लाभ घ्यावा, असे आवाहन आत्माचे प्रकल्प संचालक अमोल आगवण यांनी केले आहे.

अमोल आगवण यांनी दिलेल्या माहितीनुसार, कृषी पायाभूत सुविधा निधी योजना ऑगस्ट २०२० मध्ये आत्मनिर्भर भारत अभियान अंतर्गत सुरू करण्यात आली. या योजनेचा मुख्य उद्देश पीक काढणीनंतरच्या कृषी पायाभूत सुविधा निर्माण करणे, शेतीमालाचे मूल्यवर्धन करणे तसेच सामुदायिक शेतीसाठी आवश्यक सुविधा उपलब्ध करून देणे हा आहे. योजनेमुळे शेतमालाची साठवणूक, प्रक्रिया, वाहतूक आणि विपणन अधिक सक्षम होत असून शेतकऱ्यांच्या उत्पन्नात वाढ करण्यास मदत होत आहे.

या योजनेअंतर्गत पात्र लाभार्थ्यांना बँकांमार्फत मंजूर करण्यात येणाऱ्या २ कोटी रुपयांपर्यंतच्या कर्जावर ३ टक्के व्याज सवलत दिली जाते. याशिवाय शासनाकडून क्रेडिट गॅरंटी सुविधाही उपलब्ध करून दिली जाते. त्यामुळे कृषी क्षेत्रात पायाभूत सुविधा उभारण्यासाठी आर्थिक अडचणी मोठ्या प्रमाणात कमी होतात.

कृषी पायाभूत सुविधा निधी योजनेत विविध प्रकारच्या कृषी प्रकल्पांचा समावेश करण्यात आला आहे. गोदामे, शीतगृहे (Cold Storage), पॅक हाऊस, ग्रेडिंग आणि सॉर्टिंग युनिट, प्राथमिक प्रक्रिया केंद्रे, कृषी लॉजिस्टिक्स, सायलो, रिपनिंग चेंबर, ई-मार्केट सुविधा, जैव-इनपुट उत्पादन युनिट, कस्टम हायरिंग सेंटर तसेच इतर कृषी पायाभूत सुविधा उभारण्यासाठी या योजनेत आर्थिक सहाय्य उपलब्ध करून दिले जाते. त्यामुळे शेतकऱ्यांना शेतीमालाचे योग्य व्यवस्थापन करून अधिक चांगला बाजारभाव मिळविण्याची संधी निर्माण होते.

या योजनेचा लाभ केवळ वैयक्तिक शेतकऱ्यांपुरता मर्यादित नसून शेतकरी उत्पादक कंपन्या (FPO), शेतकरी उत्पादक संस्था (FPC), प्राथमिक कृषी पतसंस्था, सहकारी संस्था, कृषी उद्योजक, स्टार्टअप्स, स्वयं-सहाय्यता गट तसेच कृषी क्षेत्रातील इतर पात्र संस्थांनाही या योजनेचा लाभ घेता येतो.

विशेष मोहिमेदरम्यान जिल्हास्तरावर आणि तालुकास्तरावर विविध जनजागृती कार्यक्रम आयोजित करण्यात येणार आहेत. यामध्ये शेतकरी मेळावे, कार्यशाळा, बँक समन्वय बैठका तसेच लाभार्थ्यांसाठी मार्गदर्शन कार्यक्रमांचा समावेश असेल. या माध्यमातून पात्र लाभार्थ्यांना योजनेची माहिती, अर्ज प्रक्रिया, कर्ज सुविधा आणि उपलब्ध आर्थिक सवलतींबाबत सविस्तर मार्गदर्शन केले जाणार आहे.

पात्र शेतकरी आणि संस्थांनी या योजनेचा लाभ घेण्यासाठी आपल्या तालुका कृषी अधिकारी, आत्मा, कृषी विभाग किंवा जवळच्या राष्ट्रीयीकृत अथवा अनुसूचित बँकेशी संपर्क साधावा, असेही आवाहन करण्यात आले आहे.

याशिवाय इच्छुक लाभार्थ्यांनी कृषी पायाभूत सुविधा उभारण्यासाठी पुढाकार घेऊन https://agriinfra.dac.gov.in या अधिकृत संकेतस्थळावर ऑनलाइन अर्ज सादर करावेत, असेही आत्माचे प्रकल्प संचालक अमोल आगवण यांनी स्पष्ट केले आहे.

योजनेची ठळक वैशिष्ट्ये : Agriculture Infrastructure Fund